ألفة يوسف تكتب لكم: ‘الدق في الجيفة حرام’…

كتبت: ألفة يوسف 
من اللي آني صغيرة، ما نحبّش نضرب عبد ضعيف قدّامي…تعجبني ياسر عبارة: “الدقّ في الجيفة حرام”…نحبّ كيف نتعارك، نتعارك مع واحد(ة) واقف(ة) على ساقيه وشادد سلاحه(ا) كيفي…وإلاّ أقوى منّي…وحتّى في المناصب اللي تعدّيت بهم الكلّ عمري ما أهنت طالب(ة) ولا خدّام(ة)، بالعكس نحطّهم في عينيّ قدّ ما نقدر…نتعارك مع الكبار، نضرب ونتضرب (بالمعنى المجازيّ)…آما كيف يطيح خصمي، ما عادش نحبّ نضرب…موش على خاطرني ملائكة، حاشا لله، عندي كدس عيوب…آما على خاطر أنّك تعفس في الضّعيف والطّايح والمريض والهشّ والمجروح…حكاية ساهلة بارش…وما تشيّخنيش…وأنا نحبّ نشيخ حتّى في عركة…وكيف تجي تشوف، شكون فينا موش ضعيف قدّام الدّنيا، وشكون ما يحبّهاش تحنّ عليه…