طبيب من جزيرة جربة…يطلق صيحة فزع!

دون أحد الأطباء  في جزيرة جربة..علي صفحته في الفايس بوك..متحدثا عن الوضع الصحي..وعن معاناة الإطار الطبي والشبه الطبي ما يلي…

الواحد مقطع روحو مع زملائو و العايلة الصحية بكلها بصفة عامة هاهو كلمني فرملي راهو هاك المريضة فلانة تاعبة و زوز لخرين توفو

و هاهو يكلمني فرملي آخر عندي صغرون متاع ثلاثة أيام بوزيتيف هو و امو 

و برا عااااد هاكو العباد الي تلوج على concentrateur والله لا نتفكر امس قداش من واحد كلمني كلموني حتى من بن قردان

تقابلت مع الهلال الأحمر و درسنا الوضع و تفاهمنا كيفاش نجمو نسقو  

الإتصالات مع الفريق إلي قاعد يريقل في plate-forme مش عارف قداش من مرة زادة أمس لين الواحد تجوجم

العشية تواصلت مع اطار في المستشفى و قالي الوضع خايب ياسر ياسر و العدوى بين الإطارات الطبية و الشبه الطبية بدا يخوف و ان شاءالله ما يأثرش على سير العمل

بعتالي نهز ولادي يحبو يكلو قلاص لابسين كماماتهم (حتى ولدي اربعة سنين بالكمامة) تقابلني terrasse نشوف كان في زوز نساء يجوهم زوز نساء اخرين ينحو هاك البافات و يبوسو بعضهم !!  في وينك في توحشتك في عاش من راك و سلام حار حار و الطاولة لخرى كيفكيف سلام و بوس و تعنيق  🤯🤯🥺🥺🥺🥺 

نكمل في الليل مع العشرة خوكم نسمع في الشواشن بمكبرات الصوت و الجو و الشطيح و الزغاريد و الأدهى توفا الشواشن يقومو مزاودية و محفل   الساعتين رقدت و المحفل مازاااال 

ياخي أنا وين سي علاء  

يا ناس فيقو يا ناس رانا تعبنا يا ناس يا ناس إرحمونا يا ناس قدرونا يا ناس قدرو تعبنا و قدرو مجهوداتنا يا ناس رانا نخدمو و نجتهدو و نجرو و نجرو ليكم   و لمصلحتكم

راهو عيب راهو حرام عليكم راك غدوة انت يلي عامل عرس و يلي تبوس و يلي تعنق باش تكلمني تقولي خويا رؤوف بابا و إلا امي تاعبا و دبرلي بلاصة في كلينيك و إلا صبيطار يا ناس راهو قريب الصبيطار باش يولي بكلو كوفيد عن قريب 🤯🤯🤯🤯 

الواحد يقول لا حول ولا قوة الا بالله العلي العظيم و حسبنا الله ونعم الوكيل  

#لشكون_تحرقصي_يا_مرت_لعمى 🤬🤬

#savetunisia

#وينو_التلقيح

#تعبنا #حجر_صحي