نقشة: سي قيس سعيد …كان تسمح نسألك …

كتب: أبو زياد 

سي قيس سعيد ع السلامة …وان شاء الله ما نقلقكش  …عندي شوية اسئلة كان تسمح تجاوبني عليهم …واول سؤال يتعلق بالدينار اللي يشطح ويترنح ويرقص رقصة الديك المذبوح  ويقترب رويدا رويدا من الذوبان …نسالك عليه المسكين اش عمتلو باش توقف تدهورو …وهو تدهور ما ثماش تونسي ما تضرش منو … عمتلوش عملية جراحية سريعة باش يبراْ المسكين …ونبراو احنا معاه …وتهبط الاسعار …نظن ما عمتلو شيء؟…  
وثانيا نحب نسالك بالله وقتاش باش نراوك ادشن في سد …في قنطرة …في مطار …في سبيطار …في اتوروت …في جامعة …؟ وثالث باب نحب نعرف وقتاش ناوي تعمل مشروع لبناء مساكن في المتناول للشباب المقبل على الزواج …ياخي في بالك اللي اليوم اصبح من المستحيل على التونسي مهما كانت شهريتو باش يملك دار ويرتاح من الكراء …رابع مسالة ياسي قيس الى متى واحنا  نقعدو في العود …عام دخل …عام خرج واحنا هز ساق تغرق الاخرى …واستنى يا دجاجة حتى يجيك القمح من باجة …والدجاجة كان ما في بالكش ماتت من الجوع والمستنية ؟..وموش لازم عاد – يا سي قيس – نحكيلك على البطالة …والجريمة …والتكركير …والفدة …والحرقان …وفشان العجل …شوف سيدي خويا انا كيف كل مواطن برشة من هداريكم ما تهمنيش …وما تعننيش …هاذيكة اموركم تفاهمو فيها مع بعضكم …اللي يهمني انا كمواطن نحب نعيش …نحب نتمتع بحياتي …نحب ننجح وأولادي ينجحو …نحب نبدا معنقر الشاشية في بلادي …نحب تكون عندي قيمة وقدر …مانحبش التبرويل …والتبهليل …والكلام الكبير …باختصار بالله يا سيد الرئيس تكلم معايا شوية …ونحبك تفهمني …راني تعبت من اللوبانة القديمة …والسلام ..