نقشة: يا سي قيس وهاذوما اللي حرقو اش عملنا فيهم ؟؟؟

كتب: أبو زياد

شفت يا سيد الرئيس كيفاش في الوقت اللي كنت نحكي فيه معاك البارح على انتظارات الشعب …وهموم الناس …واللي يزيدهم وينقصهم بالمنجد …
في هاك الوقت بالذات وصلت مجموعة من اولادنا حرقو الى ايطاليا …وسجلو فيديو …وما نحكيليكش يا سي قيس على فرحتهم …وشيختهم …فرحو وبداو يصيحو ويضحكو ويشطحو…باختصار هبلوا من الفرحة … على خاطر كيما قال واحد منهم حرقتهم نجحت ووصلو سلامات وارتاحومن الحفرة اللي كانو مدفونين فيها …
نعرف يا سي قيس اللي كلمة حفرة توجع …الله غالب…شفت كيفاش يا سيد الرئيس اللي انا ما كذبتش عليك كي قتلك راهي هدرتكم هدرة تعنيكم انتوما أهل السياسة والأحزاب …أما ما تعنيش الشعب …العركة عركتكم اما ماهياش عركة الشعب …وصحيح اللي الشعب يريد اما الشعب لا يريد العرك والمعروك …