نقشة: ناس حايرة في زيت الحاكم وبرج دلاع ….وناس لاهية بالدستور والحوار الوطني؟؟؟

كتب: أبو زياد
ناس حايرة في زيت الحاكم المفقود وتلوج عليه من الصباح لليل … وماتلقاهش … وناس تشري في الدلاع بالبرج …وحتى البرج ماعادش خالطة عليه …
وناس مقصوص عليها الماء في الصيف الصايف …لا تشرب …لا ادوش … وناس يطردو فيهم من السبيطارات ويقولولهم براو موتو في دياركم … وناس تعبو ..وفدو …وفلقطو …وهبلو …وداخو …وتمرجو …وتهردو … وناس خايفة من الكورونا …وناس خايفة من الكلاب …وناس خايفة من الناموس …وناس خايفة من الحفر …وناس خايفة من البراكاجات …وناس خايفة على اولادها وبناتها …وناس خايفة من الفقر والميزيريا والفلس … وناس لاهية بالدستور …نبدلوه والا نعدلوه والا نرجعو للدستور بورقيبة …وثمة اشكون اقترح نرجعو لدستور الباي … ناس تمشي هايمة …وناس قاعدة على الكراسي لا تحب تمشي ولا تاقف …ولا تعف … الغريب ان الناس الهايمة والناس المكبشة عايشين في بلاد واحدة .. قداش في تونس من غرايب …في الزمن الغريب …