معز الجودي: يا ناس فيقوا….شي غريب وعجيب في البلاد هاذي!!؟

12 جانفي 2021  (22:27) الوطنية

انتقد الخبير الاقتصادي معز الجودي اليوم بشدّة ما يروج له الفنان كادوريم عن قدرته على جلب لقاح كورونا إلى تونس!!!! ووصف الجودي في تدوينة نشرها على صفحته في موقع فايسبوك الوضع بالعجيب والغريب في هذه البلاد داعيا الناس إلى أن تستفيق!!
حيث كتب يقول:
واحد رابور (Rappeur) يخدم في صورتو ويشوف في روحو رئيس بلاد فالسة، جاي يستبله في العباد بفلوس ما يعرف عليها حد منين جاية؟! ٱخرتها، هبط روحو زعما مصور مع أشخاص أجانب وقالك قاعد إتفاوض مع الحكومة الصينية بش إيجيب التلاقيح متع الكورونا لتونس وينقذ الشعب التونسي من الفيروس القاتل؟!!
المشكل موش في كذب وإستبلاه الشخص هذا، المشكل في بعض وسائل الإعلام إلي تنقل في "الخبر" و تبشر في المواطنين والمواطنات بالفرج؟!! أول حاجة، في تونس القوانين واضحة: الدولة التونسية عن طريق مؤسستها الرسمية وحدها عندها الإحتكار في مجال الأدوية والتلاقيح. يعني ما فما كان الدولة بيدها تنجم تتفاوض و تورد تلاقيح وأدوية للبلاد. الصيدلية المركزية مثلا عندها إحتكار(monopole) توريد و إعتماد و منح تراخيص توزيع الأدوية و التلاقيح.
وفما إدارات عامة و هياكل عمومية هيا إلي تراقب العمليات هذي و تضمن سلامتها وtraçabilité متع كل عملية.
ثاني نقطة: الدول والحكومات الأجنبية عمرها ما تتفاوض مع أشخاص خاصة في مجالات دقيقة وحساسة كيما التلاقيح و الأدوية.
ثالث نقطة: الصفقات و النقل و اللوجيستيك متع التلاقيح تتكلف مليارات و لازمها شركات ومؤسسات عمومية تسهر عليها و تقوم بيها.
بربي يزيونا من الشعبوية و الأخبار التافهة، البلاد في القاع و ناس مازلت تعفس و إطيح فيها للحضيض! يا توانسا فيقو، ما فما حتي شخص مهما كان و وصل، إنجم إيجي بفلوسو إمنع بلاد و شعب و يصرف عليكم!! بربي فيقو و ما تخليوش رواحكم عرضة للإستبلاه والتحيل!!!"